MDB-nin Miqrasiya Orqanları Rəhbərləri Şurasının 26-cı iclası keçirildi

Dövlət Miqrasiya Xidmətinin rəisi, II dərəcəli dövlət miqrasiya xidməti müşaviri Vüsal Hüseynovun rəhbərlik etdiyi Azərbaycan nümayəndə heyəti virtual qaydada keçirilən MDB-nin Miqrasiya Orqanları Rəhbərləri Şurasının 26-cı iclasında iştirak edib.

Teleqaraf.com xənər verir ki, Dövlət Miqrasiya Xidmətinin rəisi Vüsal Hüseynov 2021-ci il üzrə ölkəmizdə miqrasiya prosesləri və COVİD-19 pandemiyası dövründə bu sahədə görülən işlər barədə məlumat verib.

Xidmət rəisi pandemiya dövründə ölkədə miqrasiya idarəçiliyinin çeviklik, şəffaflıq, səmərəlilik və insan hüquq və azadlıqlarının müdafiəsi prinsipləri və aidiyyəti beynəlxalq təşkilatların tövsiyələri nəzərə alınmaqla təşkil edildiyini, ölkə ərazisində əcnəbilərin hüquqlarının müdafiəsi və miqrasiya xidmətlərinin daha da əlçatanlığının təmin edilməsini bildirib.

Eyni zamanda, COVID-19-un miqrantlara təsirinin minimuma endirilməsi məqsədilə Azərbaycanın miqrasiya idarəçiliyində həyata keçirilən yeniliklər, miqrantların maksimum rahatlığı, inzibati prosedurların mümkün qədər azaldılması və rəqəmsallaşmanın təşviqi istiqamətində reallaşdırılan tədbirlər haqqında məlumat verib.

Dövlət Miqrasiya Xidmətinin beynəlxalq əlaqələrindən söz açan Vüsal Hüseynov Beynəlxalq Miqrasiya Təşkilatı ilə əməkdaşlıq çərçivəsində uğurla həyata keçirilən “Azərbaycanda miqrasiya üzrə Regional Təlim Mərkəzinin yaradılmasına dəstək” layihəsi barədə məlumatı tədbir iştirakçılarının diqqətinə çatdırıb.

Xidmət rəisi 2021-ci ildə Azərbaycanın BMT-nin Miqrasiya üzrə Şəbəkəsinin himayəsi altında Miqrasiya üzrə Qlobal Kompaktın həyata keçirilməsi üçün başlanmış “Çempion ölkələr” təşəbbüsü siyahısına daxil edildiyini bildirib.

Azərbaycanın “Çempion ölkələr”dəki rolunun müsbət dəyər yaradacağını və regionun digər ölkələri üçün miqrasiyanın idarə edilməsində səmərəli model rolunu oynamasına inandığını vurğulayıb.

Daha sonra Dövlət Miqrasiya Xidmətinin Miqrasiya siyasəti və hüquqi təminat baş idarəsinin rəisi, III dərəcəli dövlət miqrasiya xidməti müşaviri Vahid Qəhrəmanov tədbir iştirakçılarına Dövlət Miqrasiya Xidmətinin miqrasiya sahəsində sənəd dövriyyəsinin rəqəmsal transformasiyası və ölkəmizdə xarici əmək miqrasiyasının tənzimlənmə təcrübəsi barədə məlumat verib.

MDB-nin Miqrasiya Orqanları Rəhbərləri Şurasının 26-cı iclasında gündəlikdə olan məsələlər ətrafında müzakirələr aparılıb.