“Bayraktar”lar iş başında – Türk PUA-larından rus ordusuna ağır zərbə

Putinin göstərişi ilə Ukraynaya ordu yeridən Rusiya gözlənilməz müqavimətlə üzləşib. Altı gündür davam edən müharibədə Ukraynanın bir çox şəhərləri bombalanıb, mülki əhalinin olduğu binalar raketlərlə vurulub. Ukrayna ordusu isə xalqla birlikdə bu hücumlara sərt cavab verir.

Teleqraf.com xəbər verir ki, kritik nöqtələrdə güclü müqavimət göstərən ukraynalılar gözlənilməz istiqamətlərdə Rusiya ordusuna ağır itkilər yaşadırlar.

Bu məqamda Ukraynanın Türkiyədən aldığı “Bayraktar” pilotsuz uçan aparatları (PUA) ön plana çıxır.

“Bayraktar”ların Ukraynanın Rusiyaya qarşı ən təsirli silahı olması faktoru amerikalı senator Marko Rubionun da diqqətini çəkib.

Senator türk PUA-ları ilə bağlı Tvitter hesabında yazıb: “Ukraynanın Türkiyə istehsalı “Bayraktar TB2” PUA-ları Rusiyanın təchizat xətlərinə böyük zərər verir”.

Ukrayna Baş Qərargahı da bu gün sosial şəbəkədə PUA-ların hücumlarının görüntülərini paylaşaraq qeyd edib: “Bayraktar TB2” pilotlarımızın incə işi ilə 1 düşmən tankı və 2 BUK zenit-raket kompleksi məhv edildi”.