Rusiya ordusu Kiyevə yaxınlaşır – “Döyüşə hazırıq”

Rusiya qoşunları Ukrayna paytaxtına yaxınlaşır, buna baxmayaraq, şəhər özünü müdafiə edə biləcək.

Teleqraf.com xəbər verir ki, bunu Kiyev meri Vitali Kliçko deyib.

“Düşmən paytaxta yaxınlaşır. Gecə saatlarında Bila Tserkvanı atəşə tutdular, Buça və Qostomeldə döyüşlər oldu. Hazırlaşırıq və şəhərimizi müdafiə edəcəyik. Kiyev ayaqdadır və ayaq üstə də dayanacaq. Biz döyüşəcəyik”, - şəhər meri vurğulayıb.

Kliçko qeyd edib ki, düşmən ukraynalıların müqavimətini qırmaq üçün dezinformasiya yayır. O, kiyevliləri səbrli olmağa, dezinformasiyaya inanmamağa, yalnız rəsmi mənbələrə etibar etməyə çağırıb.

Kliçko xatırladıb ki, Rusiya ordusu martın 1-də paytaxta hücum edib, nəticədə teleqülləyə iki raket düşüb və 5 mülki şəxs həlak olub.

Kliçko paytaxt sakinlərini həddindən artıq zərurət olmadan küçəyə çıxmamağa çağırıb.

Kiyev meri qeyd edib ki, şəhərdə nəzarət-buraxılış məntəqələri və istehkamlar qurulub.