Ukrayna qüvvələrindən rus ordusuna sarsıdıcı zərbə - Baş Qərargah

Ukraynada hərbi əməliyyatlar başlayandan Rusiya qoşunlarının 31 taktiki qrupu döyüş qabiliyyətini itirib, bəzən işğalçılar bütöv qruplar şəklində əsir götürülür.

Teleqraf.com xəbər verir ki, bu barədə Ukrayna Silahlı Qüvvələrinin Baş Qərargahı məlumat yayıb.

Bu səhərə olan məlumata görə, Ukrayna Müdafiə Qüvvələri bütün istiqamətlərdə Rusiya Silahlı Qüvvələrinin hücum əməliyyatlarını dəf edir və ya dayandırır.

Xüsusilə, Polissya, Severski, Pivdennobujski əməliyyat rayonlarında rus ordusu canlı qüvvə və texnikada xeyli itki verib, hücumları dayandırılıb.

Məlumatda qeyd edilib ki, Donetsk istiqamətində irəliləməyə çalışan rus qoşunlarına ağır zərbə endirilib və bəzi istiqamətlərdə dayandırılıb, digər yönlərdə isə irəliləmə sürəti xeyli zəiflədilib.

Baş Qərargah bildirib ki, Rusiya ordusunun əksər hissələri Ukrayna Silahlı Qüvvələrinin bölmələri ilə birbaşa döyüşlərdə ruhdan düşüb:

“Düşmənin şəxsi heyətinin mənəvi-psixoloji durumu pisləşməkdə davam edir, qruplar formasında əsir götürülmə halları müşahidə olunur.

Son üç gün ərzində düşmənin kiçik fərari dəstələri dövlət sərhədinə doğru irəliləməyə başlayıb. Rus qüvvələri ehtiyatı təchiz etməkdə böyük problem yaşayır.

Ukrayna Silahlı Qüvvələri dövlətin təhlükəsizlik və müdafiə sektorunun digər komponentləri və milli müqavimət qüvvələri ilə koordinasiyalı fəaliyyət göstərərək, Rusiya qoşunlarının kütləvi hücumunu dayandırır”.