Ukrayna ordusu ruslara ağır zərbə vurdu: general öldürüldü - Baş Qərargah

“Son sutka ərzində vəziyyət və müdafiə qüvvələrinin hərəkətlərinin xarakteri əhəmiyyətli dərəcədə dəyişməyib. Ukrayna Silahlı Qüvvələri və Müdafiə Qüvvələrinin digər bölmələri ələ keçirilən sərhədləri saxlamağa çalışan düşmən qoşunlarının qruplarına zərbələr endirməkdə davam edib. Ukraynanın zenit-raket qüvvələri və döyüş təyyarələri düşmənin 12 hava hədəfini - 2 təyyarə, 3 helikopter, 3 PUA və 4 qanadlı raketini vurub”.

Teleqraf.com xəbər verir ki, bu barədə Ukrayna Silahlı Qüvvələrinin Baş Qərargahının səhər saatlarına olan əməliyyat məlumatında bildirilir.

Qeyd edilir ki, gün ərzində ukraynalı müdafiəçilər Nikolayev və Sumı vilayətlərində işğalçıların texnikasının bir neçə kolonunu məhv ediblər, hazırda düşmənin itkiləri dəqiqləşdirilir. Bundan əlavə, düşmən tərəfə açılan atəş nəticəsində Rusiya Federasiyası Silahlı Qüvvələrinin Cənub Hərbi Dairəsinin 8-ci Ümumhərbi Ordusunun komandanı, general-leytenant Andrey Mordviçev həlak olub.

Düşmənin böyük itkilər verdiyini nəzərə alsaq, çox güman ki, Rusiya Federasiyasının hərbi-siyasi rəhbərliyi uzun sürən, yorucu müharibəni davam etdirmək üçün mövcud qanunvericiliyə düzəlişlər etmək və açıq səfərbərliyə başlamaq qərarı verəcək. Bu cür hərəkətlərə haqq qazandırmaq üçün ikinci çeçen kampaniyasından əvvəl olduğu kimi, Rusiya Federasiyası ərazisində mülki əhalinin ölümü ilə bir sıra təxribatların həyata keçiriləcəyi istisna edilmir. Bu, hökumətyönlü rəhbərliyə hərbi vəziyyət və vətəndaşların total səfərbərliyi barədə qərar qəbul etməyə imkan verəcək.

Rusiya Federasiyası Silahlı Qüvvələrinin və Rosqvardiyasının ölən və yaralı hərbçilərinin Ukrayna ərazisindən daşınması davam edir. Belə ki, Qomel şəhərində cərrahiyyə şöbələri olan bütün tibb müəssisələri yaralı işğalçıların qəbulu və müalicəsi ilə məşğuldur. Cərrahlar gecə-gündüz işləyirlər, Belarus vətəndaşlarının bütün planlaşdırılan əməliyyatları ya ləğv edilir, ya da qeyri-müəyyən müddətə təxirə salınır. Ağır yaralanmış rus işğalçıları arasında yüksək ölüm nisbəti qeydə alınır.

Düşmən ciddi itkilər verməkdə davam edir. Bölmələrin logistikasında problemlər var. Şəxsi heyətin mənəvi-psixoloji vəziyyətinin aşağı səviyyədə olması Rusiya Federasiyası silahlı qüvvələrinin hərbi qulluqçularının Ukraynaya qarşı müharibədə iştirakdan imtinası və fərarilik hallarının sayının artmasına səbəb olur.