Rusiya ordusunun üç günlük ehtiyatı qalıb – Baş Qərargah

Ukraynadakı Rusiya işğalçı qüvvələrinin üç günlük sursat və ərzaq ehtiyatı qalıb.

Teleqraf.com xəbər verir ki, bu barədə Ukrayna Silahlı Qüvvələrinin Baş Qərargahı məlumat yayıb .

Məlumatda bildirilib ki, Ukrayna Silahlı Qüvvələrinin bölmələri və Quru Qoşunlarının hava hücumundan müdafiə sistemləri ötən gün ərzində rus ordusunun 9-dan çox hava hədəfini vurub. Bunlar 1 təyyarə, 6 dron və 2 helikopterdir, vurulan raketlərin sayı dəqiqləşdirilir.

Bundan əlavə, Ukrayna Hərbi Hava Qüvvələrinin təyyarələri rusların texnikaları və canlı qüvvəsinin qruplarına sarsıdıcı zərbələr endirib, hava döyüşləri aparıb və hava hədəflərini ələ keçirib. Son 24 saat ərzində rus təyyarələrinin daha aktiv hərəkətləri qeydə alınıb.

“Düşmənin öz qoşunlarının təhlükəsizliyini təmin etməklə bağlı ciddi problemləri aradan qaldırılmayıb. Mövcud məlumat görə, Ukraynadakı Rusiya işğalçı qüvvələrinin üç gündən çox olmayan sursatı və ərzaq ehtiyatı qalıb. Yanacaqla bağlı da oxşar durum var”, - Baş Qərargahdan bildirilib.