Polşa və Litvaya “əzələ nümayişi” – Rusiya 10 qırıcını havaya qaldırdı

Rusiya Polşa və Litva arasında yerləşən Kalininqrad anklavında hərbi təlimlər keçirib.

Teleqraf.com xəbər verir ki, bu barədə Rusiyanın Baltik Donanmasının mətbuat xidməti məlumat yayıb.

Məlumata görə, hərbi təlimlərə “Su-27” qırıcıları cəlb olunub.

Təlim planına uyğun olaraq, Kalininqrada hücum edən şərti düşmən hədəfləri vurulub.

Təlimlərə 10-dan çox “Su-27” ekipajının qatıldığı bildirilib.

Bundan əvvəl Rusiya Kalininqradda nüvə başlıqları daşıya bilən “İsgəndər” ballistik raketlərini sınaqdan keçirib.

Qırıcılarla təlimlər isə qonşu İsveç və Finlandiyanın NATO-ya üzv olmaq istədiklərini elan etdikdən bir neçə gün sonra baş tutması diqqət çəkib. Rusiya buna görə İsveç və Finlandiyanı hərbi müdaxilə ilə hədələyib.