Türkiyəyə qarşı plan baş tutmadı – Yunanıstana böyük şok

Yunanıstan 2029-cu ilədək ABŞ-dan 5-ci nəsil “F-35” döyüş təyyarələri ala bilməyəcək.

Teleqraf.com xəbər verir ki, bu barədə yunan mətbuatında məlumat yayılıb.

Buna səbəb ölkə büdcəsindəki məhdudiyyətlərin olduğu bildirilib.

Yunanıstan Maliyyə Nazirliyinin hesablamasına görə, hərbi sistemlərin alınması üçün xərclər hər il 1.5-2 milyard avro təşkil edir. Yalnız 2023-cü il istisnadır. Həmin il xərclər bir qədər aşağı olacaq.

“Greekcitytimes” bildirib ki, “Rafale” döyüş təyyarələri, raket sistemləri, korvetlər və elektron sistemlər kimi bahalı alışlar sayəsində artıq xərclər zirvəyə çatıb.

2029-cu ilə planlaşdırılan tədarüklər təxminən 1 milyard avro təşkil edir. Bu səbəbdən qarşıdakı 7 il ərzində silah sistemlərinin alınması mümkün görünmür.

Bu arada Yunanıstanda 83 ədəd “F-16” döyüş təyyarəsinin “Viper” konfiqurasiyasına təkmilləşdirilməsinin 2027-ci ilə qədər başa çatdırılması gözlənilir. 24 ədəd “Rafale” qırıcısının hamısı 2024-cü ilə qədər təhvil veriləcək. Amma gecikmələrin ola biləcəyi də bildirilir.

Qeyd edək ki, Yunanıstan Baş naziri Kiryakos Mitsotakis ABŞ-a səfərində Türkiyəyə verilməli olan “F-35” qırıcılarının Afinaya satılması ilə bağlı razılaşma əldə edib. Eyni zamanda, baş nazir Vaşinqtonu Türkiyəyə “F-16” satmamağa çağırıb. Bundan sonra Türkiyə Prezidenti Rəcəb Tayyib Ərdoğan Mitsotakislə görüşdən imtina edib.