Pelosi Tayvana gedir - Bölgədə gərginlik

ABŞ Konqresinin Nümayəndələr Palatasının spikeri Nensi Pelosi Sinqapura gəlib.

Teleqraf.com xəbər verir ki, siyasətçinin Çinin sərt xəbərdarlıqlarına baxmayaraq Tayvanda dayanacağı gözlənilir.

Lakin Pelosi açıqlamasında Tayvan haqqında danışmayıb.

Onun səfəri həm Vaşinqtonda, həm də Pekində diqqətlə izlənilir.

Bundan əvvəl Çin hərbçiləri Tayvandan təxminən 80 mil məsafədə, cənub-şərqdəki Fujian əyalətinin sularında hərbi təlimlər keçirəcəklərini açıqlayıb.

Çin Hərbi Hava Qüvvələrinin sözçüsü, tarixi dəqiqləşdirmədən ölkənin qırıcılarının əraziləri müdafiə etmək qabiliyyətini nümayiş etdirmək üçün Tayvan üzərində uçacağını bildirib.

Pelosinin təyyarəsinin birbaşa Tayvana çatması gözlənilsə də, sonradan məlum olub ki, təyyarə Havay adalarına enib. Səfərdən öncə Pekin elan edib ki, Pelosinin belə bir səfərinə sərt reaksiya veriləcək.