Finlandiya müdafiə naziri Antti Kaykkönen ölkəsinin terroru qətiyyən dəstəkləmədiyini və aidiyyəti qurumların terrorla mübarizə üçün hər gün çalışdığını bildirib.
Teleqraf.com xəbər verir ki, nazir ölkəsinin NATO-ya üzvlük meyarlarına tam uyğun gəldiyini deyib.
Finlandiyanın ilin sonuna kimi NATO-ya tamhüquqlu üzv ola biləcəyini söyləyən Kaykkönen bu prosesin ən qısa vaxtda başa çatması üçün əlindən gələni edəcəyini vurğulayıb.
30 NATO ölkəsindən 23-nün Finlandiyanın üzvlüyünü təsdiq etdiyinə diqqət çəkən Kaykkönen digər 7 ölkənin parlamentinin qərarını gözlədiklərini bildirib.
Türkiyənin 7 ölkə arasında olduğunu deyən nazir Ankaranın təhlükəsizliklə bağlı narahatlıqlarını ön plana çəkdiklərini qeyd edib.
“Finlandiyada bunu hamının eşidə biləcəyi yüksək səslə deyə bilərsiniz: Finlandiya terroru dəstəkləmir. Heç bir şəkildə. Hakimiyyət terrorla mübarizə üçün hər gün çalışır və bunu uğurla həyata keçirdiyini söyləmək ədalətli olardı”, - Kaykkönen əlavə edib.
Finlandiya NATO-ya üzvlük prosesi çərçivəsində bu ərazisindəki PKK/YPG terrorçularını Türkiyəyə təhvil verəcəyinə dair öhdəlik götürüb. Bu, Ankara ilə imzalanmış müqavilədə öz əksini tapıb.