Ərdoğan Putinlə danışdı

Türkiyə Prezidenti Rəcəb Tayyib Ərdoğanla Rusiya lideri Vladimir Putin arasında telefon danışığı olub.

Teleqraf.com xəbər verir ki, bu barədə Kremlin mətbuat xidməti məlumat yayıb.

Türkiyə lideri keçmiş SSRİ-nin lideri Mixail Qorbaçovun vəfatı ilə bağlı rusiyalı həmkarına başsağlığı verib.

Avqustun 5-də Soçidə keçirilən görüşlərdə əldə olunmuş razılaşmalar çərçivəsində Rusiya ilə Türkiyə arasında çoxşaxəli əməkdaşlığın daha da inkişaf etdirilməsi məsələləri müzakirə olunub.

Ticari-iqtisadi əlaqələrin inkişafı, o cümlədən enerji sektorunda birgə strateji layihələrin təşviqi məqsədi bir daha təsdiqlənib.

Ərdoğan və Putin Akkuyu Atom Elektrik Stansiyasının tikintisi layihəsini planlaşdırıldığı kimi davam etmək əzmində olduqlarını bir daha bəyan edib.

Görüş zamanı Ukraynadakı vəziyyət də müzakirə olunub. Ərdoğan Atom Enerjisi üzrə Beynəlxalq Agentliyin Zaporoje AES-ə missiyasının təşkilində Rusiyanın konstruktiv roluna diqqət çəkib.

Görüşdə Ərdoğanın vasitəçiliyi ilə iyulun 22-də İstanbulda imzalanan taxıl müqaviləsinin icra prosesi dəyərləndirilib.