Kim Çen Inın yanındakı “sirli qadın” kimdir? – Şok iddia

Son vaxtlar Şimali Koreya lideri Kim Çen Inla görüntülənən qadın diqqəti cəlb edir.

Teleqraf.com xəbər verir ki, həmin “sirli qadın” keçən həftə açıq hava konserti zamanı Şimali Koreya liderinin yanında olub.

Eyni qadın Kimin parlamentdə nüvə silahından heç vaxt imtina etməyəcəyinə and içdiyi çıxışında yanında əlində qovluq saxlayarkən kameralara tuş gəlib.

Şimali Koreyanın ciddi nəzarət altında olan dövlət mediası aylardır qadının bəzən Kimin yanında, bəzən də arxa planda çəkilmiş foto və ya videolarını dərc edir. Amma adını heç vaxt açıqlamayıb. 30-40 yaşlarında olduğu ehtimal edilən qadının kimliyi ilə bağlı hələlik heç bir məlumat yoxdur.

ABŞ-da fəaliyyət göstərən “NK News” saytı yazır ki, qadın tez-tez adətən Şimali Koreya lideri üçün telefon, siqaret və ya dərman kimi həmişə ehtiyac duyduğu şeylərin olduğu çantanı daşıyarkən görülür.

Digər tərəfdən, qadının 30-40 yaşlarında olduğu və Kimin qohumlarından biri ola biləcəyi ehtimal edilir. Şimali Koreya liderinin 1970-ci illərdə doğulmuş ən azı iki ögey bacısının (Kim Sol Sonq və Kim Çun Sonq) olduğu bildirilir.

“NK News” qeyd edir ki, Kimin böyük bacısı Kim Yo-çonq partiya rəhbərliyində pərdə arxasında rol oynayan ən aktiv fiqurlardan biridir. Bu qadın haqda da çox az şey məlumdur.

1948-ci ildə Kim İr Sen tərəfindən qurulan rejim üç nəsil boyu “polad yumruq”la hökmranlıq edib və nadir hallarda qadınları yüksək vəzifələrdə yer verib. Bununla belə, Kim Çen In bir neçə qadına həm rəsmi, həm də qeyri-rəsmi şəkildə hakimiyyətdə vəzifə tutmağa şans yaradıb. Onlardan ən məşhuru onun 34 yaşlı bacısı Kim Yo-çonqdur ki, böyük qardaşından sonra Şimali Koreya rejiminin yeganə ən mühüm fiquruna çevrilib. O, Kimin “baş təbliğatçısı” kimi tanınır. Kimin həm ölkə daxilində, həm də xaricdə diqqətlə hazırlanmış ictimai imicinin arxasında duran şəxs olduğu deyilir.

Bundan əlavə, bu il Şimali Koreya lideri 57 yaşlı Çxve Son Xini ölkənin ilk qadın xarici işlər naziri təyin edib.