Rusiya qüvvələrini Sibirdən və Suriyadan Ukraynaya köçürür - İddia

Rusiya qvardiya bölmələrini Sibirdən, kontingentini isə Suriyadan Ukraynaya köçürməyi planlaşdırır.

Teleqraf.com xəbər verir ki, bu barədə Ukrayna Silahlı Qüvvələrinin Baş Qərargahı məlumat yayıb.

“Mövcud məlumatlara görə, Rusiya Federasiyası Silahlı Qüvvələrinin hərbi rəhbərliyi Sibir Hərbi Dairəsinin inzibati sərhədlərində yerləşən Rusiya Qvardiyası bölmələrinin və Rusiya qoşunlarının Suriyadakı kontingentinin hərbi əməliyyatlar bölgəsinə köçürülməsi barədə qərar qəbul edib”, - mesajda deyilir.

Baş Qərargah qeyd edib ki, bu yaxınlarda yaradılaraq Ukrayna ərazisinə köçürülən 3-cü Ordu Korpusunun bölmələri qarşıya qoyulan vəzifələri səmərəli şəkildə yerinə yetirə bilmir:

“Köhnəlmiş və istifadəyə yararsız silah və hərbi texnika, şəxsi heyətin özbaşına mövqelərini tərk etməsi və döyüş tapşırıqlarını yerinə yetirməkdən imtina etməsi, spirtli içkilərin qəbulu, hərbi nizam-intizamın sistematik şəkildə pozulması qeyd olunan birləşməsinin bölmələrinin hərbi qulluqçularının ruhdan düşməsinin əsas səbəbləridir”.