Almaniya narahatdır: "Qaz qıtlığı yaranacaq"

Bütün qənaət kampaniyalarına baxmayaraq, Rusiyanın Ukraynaya qarşı başlatdığı müharibədən sonra qaz təchizatında ən çox çətinlik çəkən ölkələrdən biri olan Almaniyada qaz istehlakı artıb.

Teleqraf.com xəbər verir ki, Qaz istehlakını tənzimləyən Federal Şəbəkə Agentliyinin rəqəmlərinə görə, ilin 39-cu həftəsində fərdi təsərrüfatları və kiçik kommersiya müştəriləri tərəfindən qaz istehlakı 618 giqavat saat təşkil edib.

Bildirilib ki, 2018-2021-ci illərdə bu rəqəm orta hesabla 564 gigavat saat olub. Agentliyin məlumatına görə, sənaye müştərilərinin istehlakı ötən həftə 1370 giqavat saat təşkil edib ki, bu da əvvəlki illərin səviyyəsindən 2 faiz çoxdur. Agentlik qənaət olmadığı halda qaz qıtlığından narahatdır.

Korona epidemiyası ilə başlayan tədarük zəncirindəki fasilələr və sonra Rusiya-Ukrayna müharibəsinin təsiri Almaniya iqtisadiyyatını gərginləşdirməyə başlayıb. Gələcək üçün proqnozları saxlayan iqtisadi artım proqnozları da daim dəyişir. Nəhayət, Federal İqtisadiyyat Nazirliyi bu il Almaniya iqtisadiyyatı üçün artım proqnozlarını yeniləyib. İqtisadiyyatda artımın 0,8 faiz azalaraq 1,4 faiz olacağı proqnozlaşdırılırdı.

Əslində hökumət 2021-ci ilin payız proqnozunda 2022-ci il üçün 4,1 faiz artım proqnozlaşdırmışdı. Ancaq gələn il Almaniyanı daha çətin günlər gözləyir. Federal Hökumət 2023-cü ildə iqtisadiyyatda 0,4 faiz daralma gözləyir. Yazda 6,1 faiz olacağı proqnozlaşdırılan inflyasiyanın 8 faizə yüksələcəyi gözlənilir.