Putin Berluskonini təbrik etdi: "20 şüşə araq göndərdi, məktubda isə..."

İtaliyanın keçmiş baş naziri Silvio Berluskoni Rusiya lideri Vladimir Putinlə yenidən əlaqə saxladığını və bu yaxınlarda onunla gözəl məktublar mübadiləsi apardığını bildirib.

Teleqraf.com xəbər verir ki, Berluskoni bu barədə parlamentin aşağı palatasındakı partiyasının deputatlarına danışıb.

“LaPresse”in dərc etdiyi audioyazıda Berluskoni deyir ki, Putinlə əlaqə qurub:

“O, mənə ad günüm münasibətilə 20 şüşə araq və məktub göndərdi. Mən ona bir neçə şüşə Lambrusko şərabı və eyni dərəcədə məktubla cavab verdim”.

Səs yazısında Berluskoni partiyadaşlarına da bildirib ki, Rusiya rəsmiləri dəfələrlə Qərbin Rusiyaya qarşı “biz Ukraynaya silah və maliyyə verdiyimiz üçün döyüşür” deyiblər. O, əlavə edib ki, Ukraynadakı vəziyyətdən çox narahatdır, lakin öz həqiqi fikrini ifadə edə bilmir, çünki mətbuata çıxsa, bu, fəlakət olacaq. Bununla belə, “İrəli İtaliya” partiyasının sözçüsü Berluskoninin Putinlə yenidən danışmasına qarşı çıxıb və deyib ki, o, parlamentarilərinə uzun illər əvvəlki epizodla bağlı köhnə hekayəni danışır.

Partiya daha sonra bəyanat yayıb ki, Berluskoninin və partiyanın müharibə ilə bağlı mövqeyi Avropa və ABŞ-ın mövqeyi ilə üst-üstə düşür və qeyri-müəyyənliyə yer yoxdur, heç vaxt olmayıb.

Qeyd edilir ki, sabiq baş nazirin doğum günü sentyabrın 29-da olub.