İngilis nəşrindən diqqətçənən iddia: “Türkiyə tezliklə...”

İngiltərənin “Middle East Eye” xəbər saytında Türkiyə ilə bağlı diqqətçəkən təhlil dərc olunub.

Teleqraf.com xəbər verir ki, məqalədə Türkiyənin Rusiya ilə Avropa arasında əsas vasitəçi kimi önə çıxa biləcəyi vurğulanıb.

Təhlildə Rusiyanın Türkiyədə qazpaylama mərkəzi yaratmaq təklifinin Ankara tərəfindən müsbət qarşılandığı bildirilib və Türkiyənin tezliklə güclü qaz ticarət mərkəzinə və Rusiya ilə Avropa arasında həyati enerji vasitəçisinə çevrilə biləcəyi deyilib.

Rusiyanın Ukraynaya hücumlarının enerji qiymətlərinə önəmli dərəcədə təsir etdiyi və Avropa ölkələrinin təbii qaz, neft və kömür idxalında böyük ölçüdə Rusiyadan asılı olduğu xatırladılıb:

“Rusiya son 20 ildə Avropanın enerji bazarında liderliyini qoruyub saxlayarkən, Türkiyə özünü qaz ticarət mərkəzinə çevirmək üçün önəmli həmlələr edir”.

2000-ci illərdə Türkiyənin təbii qaz bazarı və infrastrukturunun sürətlə böyüdüyü, yeni boru kəməri layihələrinin reallaşdırılması ilə Avropa İttifaqının alternativ təchizat mənbələrinə ehtiyacının sürətlə artdığı bildirilib. Təhlildə Türkiyənin yüksək təbii qaz istehlakı və idxal həcminə, eləcə də inkişaf etmiş bazara və yaxşı fiziki infrastruktura malik olduğu qeyd edilib. İstanbulun mühüm ticarət mərkəzinə çevrilməsini təmin edəcək enerji bazarının olduğu vurğulanıb.

Bildirilib ki, bütün bunlar Türkiyənin hər iki tərəfi məmnun edəcək bir aktor kimi meydana çıxması deməkdir.

Məqalədə Türkiyənin Avropaya yardım səylərinə diqqət çəkilərək, qazın bir hissəsinin iyun ayında mükəmməl formada qurulmuş mayeləşdirilmiş təbii qaz (LNG) terminalları sayəsində Bolqarıstana tədarük edildiyi qeyd edilib.

“Türkiyə iki LNG terminalı və iki üzən LNG saxlama və qazlaşdırma qurğusu ilə gündə 133 milyon kubmetr təbii qaz göndərmək gücünə malikdir”, - məqalədə deyilib.

Digər tərəfdən, Rusiya Prezidenti Vladimir Putinin bu ayın əvvəlində Türkiyədə Avropanın ən böyük qazpaylama mərkəzinin yaradılması təklifi ilə çıxış etdiyi xatırladılıb.