Məşhur amerikalı teleaparıcı vəfat etdi

Məşhur amerikalı aparıcı Barbara Volters 93 yaşında dünyasını dəyişib.

Teleqraf.com xəbər verir ki, dünyanın nüfuzlu siyasətçilərdən müsahibə almış ilk qadın jurnalistlərdən olan B.Volters ABŞ-nin Nyu-York ştatında vəfat edib.

Qeyd edək ki, Barbara Volters amerikalı televiziya aparıcısı, jurnalist və yazıçı olub. B.Volters “Today” səhər verilişi və “The View” tok-şousunu, “20/20” və “ABC Evening News” axşam xəbərləri verilişlərini aparıb və “World News”un müxbiri olub.

O, 10 il aparıcılıq etdiyi NBC-nin “Today” səhər xəbərləri ilə məşhurlaşıb və sonra 25 il ABC-nin “20/20” xəbər buraxılışına aparıcılıq edib. Karyerasının sonrakı illərində o, fəaliyyətinə görə “Emmi”nin televiziya üzrə mükafatını layiq görüldüyü “The View”da aparıcı olub. 2014-cü ildə o, peşəkar karyerasını başa vurduğunu elan etsə də, 2015-ci ilin noyabrında ABC-nin “20/20” proqramında Respublikaçıların prezidentliyə namizədi Donald Tramp və onun ailəsindən müsahibə götürüb.