26 Yanvar 12:34
938
12 Punto 14 Punto 16 Punto 18 Punto

Razılaşma olsa da, Ermənistanla Türkiyə arasında hava yükdaşımaları həyata keçirilmir.

Teleqraf.com xəbər verir ki, bu barədə Ermənistanın “Joxovurd” qəzeti məlumat yayıb.

2023-cü ildə yanvarın 1-dən Türkiyə ilə Ermənistan arasında birbaşa hava yükdaşımaları başlamalıydı. Bu, Ermənistan və Türkiyənin xüsusi nümayəndələri arasında əldə olunan razılaşmalardan biri idi.

Yanvarın 6-da Ermənistan Xarici İşlər Nazirliyinin sözçüsü Vahan Hunanyan məsələ ilə əlaqədar belə demişdi:

“Türkiyə tərəfi bu gün bizə məlumat verdi ki, birbaşa hava yüklərinin daşınmasına qoyulan qadağa aradan qaldırılıb. Bu barədə razılaşma ötən il iyulun 1-də xüsusi nümayəndələrin görüşündə əldə olunub”.

“Joxovurd” Ermənistan İqtisadiyyat Nazirliyinə müraciət edərək, qadağa götürüldükdən sonra hava yüklərinin daşınması üçün müraciətlərin olub-olmaması ilə maraqlanıb.

Nazirlik qadağanın götürüldüyünü təsdiqləsə də, həll edilməli olan bir sıra məsələlərin olduğunu diqqətə çatdırıb: “Uçuşların həyata keçirilməsi üçün gömrük və digər prosedurlar hələ də aparılmalıdır”.

Yəni qərar var, siyasi bəyanat var, amma bunun reallaşması üçün lazım olan məsələlər həllini tapmayıb.


Müəllif: Mənsur Rəğbətoğlu