400 minlik ordu hərəkətə keçir - Rusiyanın dəhşətli hücum planı ortaya çıxdı

Müharibədə iştirak edən rus hərbçilərinin sayı 400 min nəfərə qədər arta bilər.

Teleqraf.com xəbər verir ki, bunu hərbi ekspert Roman Svitan bildirib.

Ekspert Rusiya hərbi komandanlığının bu sayın yarısını Donetsk istiqamətinə köçürəcəyini deyib:

“İndi sərhədə daha 100 minə yaxın adam köçürülür. Təzyiq artacaq və pik hədd fevralın 20-dən sonra, ayın üçüncü ongünlüyündə gözlənilir.

400 minlik qoşun bir istiqamətdə zərbə endirməyəcək. Onlar Kinburn Spitdən Kupyanska qədər min kilometrlik cəbhə boyu səpələnəcəklər. Deyə bilərik ki, bu 400 min nəfərin yarısı bizim qoşunlarımızı Donetsk istiqamətində sıxışdırmağa çalışacaq”.

“Financial Times”ın məlumatına görə, Ukrayna hakimiyyətinə Rusiyanın 10 gün ərzində baş verə biləcək yeni hücumu barədə məlumat verilib. Analitiklər hücumun ehtimal olunan istiqamətini Luqansk vilayətinin Kremennaya və Liman bölgəsinin qərb hissəsini adlandırırlar.

Eyni zamanda, istefada olan general-leytenant Ben Hodqes Rusiya ordusunun mümkün böyük hücumuna şübhə ilə yanaşır.

ISW-yə görə, Rusiyanın uğurlu böyük hücumu üçün kifayət qədər döyüş gücü yoxdur.