Putinin keçmiş xanımından böyük sıçrayış – Müharibə başlayandan bəri...

Rusiya Prezidenti Vladimir Putinin keçmiş həyat yoldaşı Lüdmila Oçeretnanın mikromaliyyə şirkəti Ukrayna ilə müharibə ili ərzində 140 milyon rubl zənginləşib. Bu, Rusiyanın savaşa başlamasından sonra rusların borclarının rekord həddə çatması ilə əlaqəlidir.

Teleqraf.com xəbər verir ki, bu barədə Ukraynanın “Unian” agentliyi Rusiyadakı mənbələrə istinadla məlumat yayıb.

Avtomobil krediti xidmətləri təklif edən Oçeretnanın “CarMoney” şirkəti ilin sonunda 391.3 milyon rubl qazanıb, bu, rekord gəlirdir. Şirkətin xalis mənfəəti əvvəlki illərlə müqayisədə 66 faiz artıb.

Oçeretna bu işə 2017-ci ildə girib, 2022-ci ilin ortalarında ”CarMoney” Rusiyada mənfəət baxımından 5-ci mikromaliyyə şirkəti, mikrokredit portfelinin ümumi həcminə görə 8-ci olub. Oçeretna keçən il “CarMoney”dən şəxsən 58 milyon rubl alıb.

Ödənişlər Cənubi Kiprdə yerləşən ofşor mikromaliyyə şirkəti “Carmoney CY” LTD vasitəsilə həyata keçirilib. Bu da 99 faizi Rusiya prezidentinin keçmiş həyat yoldaşına məxsus olan “Meridian” şirkəti tərəfindən idarə olunur.

Putin və Lüdmila 1983-cü ildə evlənib, 2013-cü ildə boşanıblar. Bundan sonra özündən 20 yaş kiçik biznesmen Artur Oçeretnı ilə ailə həyatı qurub.