Rus ordusu beş istiqamətdə irəliləyir – 55-dən çox hücum dəf edildi

Rusiya ordusu ağır itkilər bahasına Liman, Baxmut, Avdiv, Marin və Şaxtyor istiqamətlərində irəliləməyə davam edir.

Teleqraf.com xəbər verir ki, bu barədə Ukrayna Silahlı Qüvvələrinin Baş Qərargahı məlumat yayıb.

Son 24 saat ərzində Ukrayna Müdafiə Qüvvələrinin bölmələri Rusiya qoşunlarının 55-dən çox hücumunu dəf edib. Baxmut və Marin uğrunda ağır döyüşlər gedir.

Ruslar Liman istiqamətində taktiki mövqelərini yaxşılaşdırmağa çalışırlar. Amma Kreminna rayonu və Serebryanskın meşəlik ərazilərinə hücumları uğursuzluqla bitib.

Rusiya qüvvələri Baxmut şəhərinə hücumlarını davam etdirirlər. Ukrayna hərbçiləri Xromov rayonunda Rusiyanın hücumlarını dəf edib.

Ruslar Avdiv istiqamətində eyniadlı şəhərə, Vodyannı və Pervomayski rayonlarına hücum əməliyyatları keçirsələr də, hədəflərinə nail ola bilməyiblər.

Ukrayna Silahlı Qüvvələri gün ərzində Marində iki istiqamətdə rus ordusunun çoxsaylı hücumlarının qarşısını alıb.

Rusların Şaxtyor istiqamətində Vuqledar şəhərinə hücumları nəticəsiz başa çatıb.