İran PUA-ları kömək etmədi – Rusiya ordusuna endirilən zərbə sərt oldu

Rusiya qoşunlarının əsas səyləri Baxmut, Avdiv və Marin istiqamətlərində hücum əməliyyatlarının aparılmasına yönəlib. Ukrayna müdafiə qüvvələrinin bölmələri gün ərzində cəbhənin bu ərazilərinə rusların 43 hücumunun qarşısını alıblar.

Teleqraf.com xəbər verir ki, bu barədə Ukrayna Silahlı Qüvvələrinin Baş Qərargahı məlumat yayıb.

Ən şiddətli döyüşlər Baxmut və Marin uğrunda gedir. Xüsusilə də Baxmut istiqamətində aktiv hücum davam edir. Rusların gün ərzində Novomarkov və Xromov yaşayış məntəqələri istiqamətlərindəki hücumları uğursuzluqla nəticələnib.

Rusiya qoşunları Avdiv istiqamətində Novokalynov, Stepov, Severna və Pervomaysk yaxınlığında hücum əməliyyatları keçirib, amma nəticəsiz qalıb.

Ukrayna ordusu Marin istiqamətində də rusların çoxsaylı hücumlarının qarşısını alıb.

Bundan başqa, Ukrayna aviasiyası son 24 saat ərzində Rusiya ordusunun şəxsi heyəti və hərbi texnikalarının cəmləşdiyi ərazilərə 9, eləcə də zenit-raket komplekslərinə 3 zərbə endirib. Ukrayna hərbçiləri Rusiyanın müxtəlif tipli 10 PUA-sını (İran istehsalı) məhv ediblər.

Ukraynanın raket qoşunları və artilleriya bölmələri Rusiyanın zenit-raket kompleksi və 2 elektron döyüş stansiyasını vurub.