Rusiya ukraynalı hərbçiləri Macarıstana təhvil verdi

Zakarpat əsilli ukraynalı hərbi əsirlərin Macarıstana təhvil verilməsi başa çatıb. Proses rus pravoslav kilsəsinin iştirakı ilə baş tutub.

Teleqraf.com xəbər verir ki, bu, Macarıstan tərəfinin xahişi ilə kilsələrarası əməkdaşlıq çərçivəsində keçirilib.

“2023-cü il iyunun 8-də Moskva və Bütün Rusiyanın Patriarxı Kirillin xeyir-duası, Rus Pravoslav Kilsəsinin vasitəçiliyi ilə kilsələrarası əməkdaşlıq çərçivəsində Macarıstan tərəfinin xahişi ilə döyüş əməliyyatlarında iştirak etmiş bir qrup Zakarpat əsilli ukraynalı hərbi əsirlər Macarıstana təhvil verilib”, - məlumatda deyilib.

Qeyd edək ki, Ukraynanın Zakarpatye vilayəti macarəsilli ukraynalıların yığcam məskunlaşdığı ərazidir. Region əhalisinin təqribən 10 %-i macardır.