Cəbhədə son durum: Rus ordusu itkilərlə geri çəkildi

Son sutka ərzində 38 toqquşmanın baş verdiyi Liman, Baxmut və Marin istiqamətlərində döyüşlər davam edir.

Teleqraf.com xəbər verir ki, bu barədə Ukrayna Silahlı Qüvvələrinin Baş Qərargahı məlumat yayıb.

Rusiya qoşunları Baxmut istiqamətində Boqdanivkada nəticəsiz hücum əməliyyatı keçirib. Sergivka, Soledar və Bila Qoraya hava zərbələri endirilib.

Rusiya ordusunun Marin və Liman şəhərlərinə hücumları da uğursuzluqla başa çatıb. Bu yöndə bir sıra yaşayış məntəqələri atəşə məruz qalıb.

Baş Qərargah qeyd edir ki, ruslar Pervomaysk istiqamətində Avdivə hücuma cəhd edib. Avdiv və Severnıya aviazərbələr endirilib. Bu durum Şaxtyorda da təkrarlanıb.

Rusiya qüvvələrinin Kupyana hücumu da heç bir nəticə verməyib, itkilərlə geri çəkilməli olublar.

Rusiya Zaporoje və Xerson istiqamətlərində əsas səylərini Ukrayna qoşunlarının irəliləməsinin qarşısını almağa yönəldib.

Bundan başqa, son sutkada Ukrayna aviasiyası Rusiyanın şəxsi heyətinin cəmləşdiyi altı mövqeyə zərbələr endirib. Nəticədə rusların komanda məntəqəsi vurulub, 12 artilleriya bölməsi atəş mövqeyində, canlı qüvvənin cəmləşdiyi ərazi, 2 sursat anbarı və 3 mühüm hədəf məhv edilib. Əlavə olaraq, 2 “Kalibr” qanadlı raketi və “Şahid” (İran) tipli 7 hücum PUA-sı sıradan çıxarılıb. Şimal istiqamətindən atılan 4 naməlum tipli dron da məhv edilib.