Priqojinin gizli planı deşifrə edildi – Seçkiyə hazırlaşırmış

Rusiya xüsusi xidmət orqanları saytlarda “Vaqner” qrupunun lideri Yevgeni Priqojinin reklamını əngəlləməyə başlayıb.

Teleqraf.com xəbər verir ki, iyunun 28-dən bəri “Vaqner” rəhbərini dəstəkləyən 7 sayt bloklanıb.

“Roskomsvoboda”nın məlumatına görə, bloklanmış saytlardan birinin ön səhifəsində Priqojinin şəkli və “Dəqiq vurmalısan. Vicdanla işləməlisən” ifadəsi dərc olunub. Saytlar həmçinin “Vaqner” liderini “Rusiyanı Avropa və Amerikaya satmayacaq adam” adlandırırlar.

Bütün bu saytlar eyni materialları dərc edib, eyni tezislər üzrə işləyiblər. Sözügedən informasiya mənbələrində dərc olunan müxtəlif mətnlər seçkiqabağı kampaniyalardakı şüarlara bənzəyir. Onlardan biri belədir: “Rusiyanı xilas etmək üçün Priqojini dəstəkləməyə hazır olun. Yeni Rusiyanın yeni lideri”.

Rusiya mətbuatı saytların “Vaqner” liderinə məxsus olduğunu yazır.

Rusiyada növbəti prezident seçkiləri 2024-cü il martın 17-də keçiriləcək.