Rus ordusu Ukrayna səddini keçə bilmədi - Hücum dayandırıldı

Rusiya qüvvələri son sutka ərzində Liman istiqamətində Ukrayna qoşunlarını Berestovonun şimal-qərbində yerləşən mövqelərindən çıxarmağa cəhd ediblər, amma buna nail olmayıblar.

Teleqraf.com xəbər verir ki, bu barədə Ukrayna Silahlı Qüvvələrinin Baş Qərargahı məlumat yayıb.

Rus ordusu əsas səylərini Liman, Marin, Baxmut, Kupyan və Avdiv istiqamətlərinə yönəldib. Gün ərzində bu ərazilərdə ümumilikdə 36 toqquşma qeydə alınıb.

Rusiya qoşunlarının Marin və Avdiv şəhərlərini işğal etmək cəhdləri uğursuz alınıb. Bütün hücumları Ukrayna ordusu tərəfindən dəf edilib.

Ruslar Baxmut istiqamətində Berxivka yaxınlığında hücum əməliyyatı keçiriblər. Ərazilərə aviasiya və artilleriyadan atəş açıblar, amma nəticə əldə edə bilməyiblər.

Rusiya qoşunları Kupyan istiqamətində Novoselivsk və Stelmaxivka rayonlarında irəliləməyə cəhd edib. Ukrayna müdafiəni möhkəm saxlayıb, bütün hücumların qarşısı alınıb. Bundan əlavə, ruslar Şaxtyor istiqamətində Blaqodatnı yaxınlığında irəliləməyə çalışıb, amma bu səyləri də nəticəsiz bitib.