Ukrayna ordusundan ölümcül zərbə: Ruslar hücumu itkilərlə dayandırdılar

Rusiya qüvvələri Kupyan, Liman, Baxmut, Avdiv və Marin şəhərlərinə hücumlarını davam etdirirlər. Son sutka ərzində bu ərazilərdə 30-a yaxın toqquşma baş verib.

Teleqraf.com xəbər verir ki, bu barədə Ukrayna Silahlı Qüvvələrinin Baş Qərargahı məlumat yayıb.

Rus qoşunlarının Kupyan və Liman istiqamətlərindəki hücumları dayandırılıb. Bu ərazilərdə 10-dan çox yaşayış məntəqəsi atəşə tutulub.

Ukrayna qüvvələri Baxmut istiqamətində güclü təyyarə və artilleriya atəşləri altında müdafiə və əks-hücum əməliyyatlarını davam etdirirlər. Son sutka ərzində Baxmut yaxınlığında – Berxivkada rusların bütün hücumlarının qarşısı alınıb. 15-dən çox yaşayış məntəqəsi atəşə tutulub.

Rusiya ordusu Avdiv istiqamətində Ukrayna qüvvələrinə artilleriya ilə təzyiqləri davam etdirir. Ukraynalılar güclü atəş altında Pervomaysk yaxınlığındakı hücumları dayandırıblar. Rusların Marinə hücumları da nəticəsiz bitib.

Ukrayna qüvvələri son sutka ərzində bu ərazilərdə 550 rus hərbçisini məhv edib. Beləliklə, Rusiyanın Ukraynadakı ümumi itkiləri 236 590 nəfərə çatıb.