Türkiyəyə qarşı savaşa yol açacaq qərar – Anlaşma pozulur

ABŞ-dan Egey dənizində sülhə, sabitliyə və əmin-amanlığa təhlükə yaradacaq addım atılıb.

Teleqraf.com xəbər verir ki, Konqresin Nümayəndələr Palatasının demokrat üzvü Qreys Menqin Milli Müdafiə Səlahiyyəti Qanununa əlavə təklifi yekdilliklə qəbul edilib.

Qəbul edilən əlavə maddə ilə ABŞ-ın Egey dənizindəki “yunan adaları”nda hərbi baza qurmasının yolu açılır. Məlumatda qeyd olunur ki, qəbul edilən skandal əlavə 2021-ci ilin oktyabrında ABŞ və Yunanıstan arasında imzalanmış Birgə Müdafiə Əməkdaşlıq Sazişi çərçivəsində hazırlanıb.

Əlavənin məzmununda ABŞ müdafiə naziri və dövlət katibindən Konqresin müvafiq komitələrinə Yunanıstanla müdafiə əlaqələri, o cümlədən mümkün əlavə hərbi bazalar, xüsusilə, ABŞ-ın “yunan adaları”nda hərbi mövcudluğunu genişləndirilməsi ilə bağlı hesabatı birgə təqdim etmələri xahiş olunur.

Əlavənin qəbulu üçün Senat və Konqresin təsdiqi lazımdır. Hər iki tərəf razılaşarsa, qanun imza üçün ABŞ Prezidenti Co Baydenin masasına göndəriləcək.

ABŞ-ın Yunanıstanda, Dədəağac, Kavala, Saloniki, Larisa, Stefanoviç və Kritdə hərbi bazaları var. Türkiyə sərhədindən cəmi 20 kilometr aralıda Dədəağacda qurulan ABŞ bazasında onlarla zirehli texnika və helikopter yerləşdirilib.

ABŞ-ın hərbi bazalar yerləşdirəcəyi ehimal olunan Taşoz, Səmadirək, Limni, Bozbaba, Midilli, Saqqız, İpsara, Sisam və Axikeriya adaları 1923-cü il Lozanna Sülh Müqaviləsinə uyğun olaraq qeyri-hərbi statusda qalmaq şərtilə Yunanıstanın suverenliyi altındadır. 1947-ci il Paris Sülh Müqaviləsinə uyğun olaraq tərksilah edilmək şərtilə suverenliyi İtaliyadan Yunanıstana verilən Şərqi Egey adaları “On iki ada” adlanır. Arxipelaq 12 yox, 14 adadan ibarətdir.