Rus ordusunun hücumu dayandırıldı - Mövqeləri darmadağın edildi

Ukrayna müdafiə qüvvələri Avdiv və Marin yaxınlığında Rusiya qoşunlarının hücumlarını uğurla dəf edib.

Teleqraf.com xəbər verir ki, bu barədə Ukrayna Silahlı Qüvvələrinin Baş Qərargahı məlumat yayıb.

Son sutka ərzində cəbhədə tərəflər arasında 30-dan çox toqquşma baş verib. Xüsusilə, əsas səylərini Avdivə yönəldən Rusiya qoşunları Ukrayna ordusunun güclü müqavimətindən sonra itkilərlə geri çəkilməli olublar. Bundan əlavə, ukraynalılar Marin istiqamətində Rusiya qoşunlarının irəliləməsini dayandırmaqda davam edir.

Eyni zamanda, Baş Qərargah Ukrayna ordusunun Melitopol istiqamətində hücum əməliyyatını davam etdirməsi barədə məlumat verib.

Son sutka ərzində Ukrayna hərbçiləri Rusiyanın mövqelərinə növbəti sarsıdıcı zərbə endiriblər. Nəticədə rusların zenit-raket komplekslərini, artilleriya qurğularını, idarəetmə məntəqəsini və sursat anbarlarını məhv etmək mümkün olub.

Ukrayna aviasiyası gün ərzində Rusiyanın şəxsi heyətinin cəmləşdiyi ərazilərə 11, zenit-raket komplekslərinə isə 2 zərbə endirib.