Türkiyə ilə anlaşma pozuldu – Rus qırıcısı bölgəni bombardman etdi

Rusiyaya məxsus döyüş təyyarəsinin İdlibə (Suriya) endirdiyi zərbələr nəticəsində 2 mülki şəxs həlak olub, 5-i isə yaralanıb.

Teleqraf.com xəbər verir ki, Xmeymim hava bazasından havaya qalxan döyüş təyyarəsi İdlibin Ayn Şib kəndinə hava zərbələri endirib.

“Ağ Dəbilqəlilər” Briqadası hücumda 2 mülki vətəndaşın həyatını itirdiyini, 5-nin isə yaralandığını açıqlayıb.

2017-ci ildə Astana görüşündə Türkiyə, Rusiya və İran Suriya rejiminin nəzarətində olmayan ərazidə 4 deeskalasiya zonası yaratmaq qərarına gəlib. Anlaşmaya baxmayaraq, rejim qüvvələri, İranın dəstəklədiyi terrorçular və Rusiya hücumlarını davam etdirərək 4 bölgədən 3-nü ələ keçirərək İdlibə doğru irəliləməyə çalışırlar.

Türkiyə 2018-ci ilin sentyabrında Rusiya ilə atəşkəsi təmin üçün əlavə razılaşma əldə etsə də, 2019-cu ilin mayında hücumlar yenidən güclənib. Türkiyə ilə Rusiya arasında 2020-ci il martın 5-də imzalanan yeni razılaşmadan sonra atəşkəs qismən qorunub.

2017-2020-ci illərdə hücumlardan qaçan 2 milyona yaxın mülki şəxs Türkiyə sərhədinə yaxın ərazilərə köç etmək məcburiyyətində qalıb.