Ərdoğan Putinlə görüşə gedir – Qovluğundakı məsələlər bəlli oldu

Türkiyə Prezidenti Rəcəb Tayyib Ərdoğan rusiyalı həmkarı Vladimir Putinlə sentyabrın 19-da BMT Baş Assambleyasının 78-ci sessiyası başlamazdan əvvəl danışıqlar aparacağını gözləyir.

Teleqraf.com xəbər verir ki, bu barədə TASS-a Ankaradakı siyasi dairələrdəki mənbə məlumat verib.

“Ərdoğan və Putin Baş Assambleyanın açılışından əvvəl görüşəcək. Yekun tarix hələ də müzakirələr mərhələsindədir, amma BMT Baş Assambleyasından əvvəl baş tutacaq”, - mənbə rus agentliyinə bildirib.

O, həmçinin əlavə edib ki, tərəflər Ukraynadakı münaqişənin sülh yolu ilə həlli perspektivlərini diqqətlə müzakirə etmək niyyətindədir. Bundan əlavə, Ərdoğan və Putin həm taxıl müqaviləsini, həm də ərzaq məhsullarının çatdırılması üçün mümkün alternativləri müzakirə edəcəklər.

“Ankaranın mövqeyi bir neçə dəfə ifadə olunub, o cümlədən Hakan Fidan ötən günlərdə Kiyevdə nəzəri alternativlərdən fərqli olaraq, tədarük marşrutu baxımından taxıl sövdələşməsinin orijinal variantına üstünlük verildiyini bildirib. Liderlər arasında Rusiyada keçiriləcək danışıqlarda sazişin əvvəlki formada bərpası məsələsi müzakirə ediləcək. Amma ehtiyacı olan ölkələrə taxıl çatdırmaq üçün mümkün alternativlər də gündəmdə olacaq”, - TASS-ın mənbəsi deyib.

Rusiya agentliyi bundan əvvəl mümkün görüşün sentyabrın 4-də Soçidə keçiriləcəyini yazmışdı.