Müdafiə xətti boyunca hücuma keçdilər - Ərazilər addım-addım azad olunur

Ukrayna ordusu Robotində irəliləyib, Verbovoda isə Rusiyanın istehkamları xətti boyunca irəliləyir. Rusların döyüş sursatı və silahı tükənir.

Teleqraf.com xəbər verir ki, bu barədə ABŞ-ın Müharibə Araşdırmaları İnstitutu (ISW) məlumat yayıb.

Ukrayna qoşunlarının Zaporoje vilayətinin qərbində irəlilədiyi bildirilir. Rusiya qoşunları Robotinin şimal-qərbində və qərbində Ukraynanın mövqelərinə zərbələr endiriblər. Bu onu göstərir ki, ruslar əvvəllər əraziyə nəzarət etdiklərini iddia etsələr də, Ukrayna qüvvələri artıq burada yerləşib.

Bundan başqa, Ukrayna qüvvələri Robotindən cənuba, Verbovodan şimal-qərbə doğru irəliləyib. Ukraynalıların bu yaşayış məntəqələri ərazilərində rus istehkamları boyunca irəlilədikləri qeyd olunur.

Ukrayna ordusu Orixovun cənubundakı Robotin-Novoprokopivka istiqamətində də uğur qazanıb, həmçinin Baxmutun cənubuna həmlələr də uğurlu alınıb. Eyni zamanda, ruslar Ukraynanın əks-hücumları fonunda müəyyən hərbi vasitələrinin və artilleriya üçün sursatın olmamasından şikayətlənirlər.

ISW-yə görə, Ukrayna qoşunları Donetsk və Zaporoje vilayətlərinin sərhəd ərazilərində də müsbət nəticələr əldə edib. Ukraynalılar bu istiqamətdə Rusiyanın hava-desant diviziyasının bölmələrini darmadağın edərək, qarşı tərəfin Zaporojenin qərbindəki kritik nöqtələrdə yerləşməsinə mane olub.