Tokayev: “Türkiyə ilə əməkdaşlığın gücləndirilməsi üçün böyük imkanlar var”

“Qardaş Türkiyə ilə əlaqələr strateji tərəfdaşlıq səviyyəsinə çatıb. Türkiyə Qazaxıstanın dörd aparıcı ticarət tərəfdaşından biridir. Ötən il ikitərəfli ticarət dövriyyəsi 54% artaraq 6,3 milyard dollara çatıb. Biz bu rəqəmi 10-a çatdırmaq barədə razılığa gəldik”.

Teleqraf.com xəbər verir ki, bunu Qazaxıstan Prezidenti Kasım-Jomart Tokayev Astanada Türkiyənin xarici işlər naziri Hakan Fidan ilə görüşü zamanı bildirib.

O qeyd edib ki, iki ölkə arasında investisiya əməkdaşlığı dinamik inkişaf edir.

“Türkiyə Qazaxıstanın 10 ən böyük sərmayədarından biridir. Hazırda ümumi dəyəri 2,8 milyard dollardan çox olan 36 layihə üzərində iş gedir. Hesab edirik ki, iki ölkə arasında əməkdaşlığın böyük perspektivləri var”, - deyə Qazaxıstan prezidenti vurğulayıb.

Hakan Fidan qeyd edib ki, Türkiyə tərəfi iki ölkə arasında əməkdaşlığın inkişaf etdirilməsi, o cümlədən regional və beynəlxalq strukturlar çərçivəsində qarşılıqlı fəaliyyəti yeni səviyyəyə çıxarmaq üçün hər cür səy göstərmək niyyətindədir.