Ən qaynar dörd istiqamət – Rus ordusunun Ukraynadakı son uğursuzluqları

Son sutka ərzində cəbhədə Ukrayna və Rusiya qüvvələri arasında 70 toqquşma baş verib. Rusiya qoşunlarının bütün hücum cəhdləri uğursuz olub.

Teleqraf.com xəbər verir ki, bu barədə Ukrayna Silahlı Qüvvələrinin Baş Qərargahı məlumat yayıb.

Gün ərzində ən şiddətli döyüşlər dörd istiqamətdə - Avdiv, Baxmut, Marin və Kupyanda qeydə alınıb. Xüsusilə, ruslar Avdiv istiqamətində adıçəkilən şəhəri mühasirəyə almaq cəhdlərini dayandırmır. Ukrayna ordusunun bu istiqamətdə müdafiəni möhkəm saxladığı bildirilir.

Rus ordusunun Stepovoy, Tonenkoy və Severnıya hücumları da uğursuz alınıb. Eləcə də Marin, Novomixaylivka, İvanivka, Sinkivka, Boqdanivka və Xromovoya.

Rusiya hərbçiləri Klişçivka və Andrivka yaxınlığında itirilmiş mövqelərini bərpa etməyə cəhd etsə də, bu səyləri nəticəsiz bitib.

Eyni zamanda, Ukrayna ordusu Melitopol istiqamətində və Baxmut şəhərinin cənubunda hücum əməliyyatlarını davam etdirir.