Rus ordusu hücuma keçdi - İki istiqamətdə döyüşlər qızışdı

Son sutkada ən qızğın döyüşlər Avdiv və Marin istiqamətlərində baş verib. Ümumilikdə cəbhədə ruslarla 65 toqquşma qeydə alınıb.

Teleqraf.com xəbər verir ki, bu barədə Ukrayna Silahlı Qüvvələrinin Baş Qərargahı məlumat yayıb.

Rusiya qoşunları Xarkovun Sinkivka, Petropavlivka, İvanivka ərazilərində hücum əməliyyatları keçirib. Ukrayna hərbçiləri bu ərazilərdə rusların 7 hücumunu dəf ediblər.

Rusiyanın Liman istiqamətində Nadiya, Baxmut istiqamətində Klişçivka və Andrivkaya hücumlarının da qarşısı alınıb.

Öz növbəsində Ukrayna ordusu Baxmut şəhərinin cənubunda hücumlarını davam etdirir.

Rusiya qüvvələri Avdiv şəhərini mühasirəyə almağa cəhd etməyi dayandırmır, Ukrayna hərbçiləri müdafiəni möhkəm saxlayırlar. Rusların bu istiqamətdə hücumları uğursuz olub.

Ukrayna hərbçiləri Marin və Novomixaylivka rayonlarında Rusiya qoşunlarının 22 hücumunu dəf ediblər. Ruslar Şaxtyor və Zaporoje istiqamətində Novodarivka yaxınlığında hücum əməliyyatları keçirsələr də, bu səyləri nəticə verməyib.

Ukraynanın müdafiə qüvvələri Melitopol istiqamətində hücum əməliyyatını davam etdirir.