Cəbhə cəhənnəmə döndü – Bütün istiqamətlərdə hücuma keçdilər

Rusiya ordusu müharibə qanunları və ənənələrini heçə sayır, terror taktikalarından istifadə edir, təkcə hərbçilərə yox, mülki şəxslərə də raket qurğularından zərbələr endirir. Son 24 saatda cəbhədə 96 toqquşma baş verib.

Teleqraf.com xəbər verir ki, bu barədə Ukrayna Silahlı Qüvvələrinin Baş Qərargahı məlumat yayıb.

Ukrayna qüvvələri Kupyan istiqamətində Sinkivkada qarşı tərəfin 9 hücumunu dəf edib. Liman istiqamətində isə rusların Tern, Yampolivka və Makivkada 5 həmləsinin qarşısı alınıb.

Ukrayna ordusu Baxmut istiqamətində Boqdanivka, İvanovsk, Klişçivka və Andrivka yaxınlığında Rusiyanın 18 hücumunu dəf edib.

Rusiya qoşunları Avdiv şəhərini mühasirəyə almaq cəhdlərini dayandırmır. Ukrayna müdafiə qüvvələri Novobaxmutivka və Avdivdə 20, Stepovoy, Severnoy və Pervomayskda rusların 14 hücumunu uğurla dəf edib.

Ukraynalılar Marin istiqamətində Krasnoqorivka və Novomixaylivka ərazilərində Rusiya ordusunu cilovlayır. Burada 13 hücumun qarşısı alınıb.

Şaxtyor istiqamətində Staromayorsk yaxınlığında Rusiyanın 2 hücumu dəf edilib. Zaporoje istiqamətində Novopokrovka və Robotində də 8 belə həmlə uğursuz alınıb.

Eyni zamanda, Ukrayna ordusu Melitopol istiqamətində bütün cəbhə xətti boyunca əks-hücum əməliyyatlarını davam etdirir. Ukraynalılar Xersonda Dnepr çayının sol sahilində də aktiv döyüş əməliyyatları aparırlar.