Hindistan “Akaş” komplekslərinin Ermənistana satışının bəzi detallarını açıqladı

Hindistan yaxın bir neçə ay ərzində Ermənistana özünün “Akaş” zenit-raket komplekslərinin tədarükünə başlamaq niyyətindədir.

Teleqraf.com xəbər verir ki, bu barədə Hindistanın Müdafiə Nazirliyi məlumat yayıb.

“Ermənistana çatdırılmaların yaxın bir neçə ay ərzində başlanması gözlənilir”, - deyə məlumatda qeyd olunur.

Agentliyin məlumatına görə, Ermənistan bu hava hücumundan müdafiə sistemlərini Hindistandan 600 milyon dollara alıb.

“Bir çox ölkə, o cümlədən Braziliya, Misir və Filippin “Akaş” hava hücumundan müdafiə sisteminə maraq göstərir”, - agentlik mənbədən sitat gətirib.

Qeyd edək ki, “Akaş” qısa mənzilli zenit-raket kompleksi Hindistan Müdafiə Araşdırma və İnkişaf Təşkilatı tərəfindən yaradılıb. Kompleksin ilk uğurlu sınaqları 2007-ci ilin dekabrında baş tutub. O vaxtdan bəri bir neçə yeni modifikasiya yaradılıb.