ABŞ-ın İraqdakı hərbi bazası raketlə vuruldu

ABŞ-ın İraqın Ənbar əyalətindəki Ayn əl-Əsəd hərbi bazasına raket zərbəsi endirilib.

Teleqraf.com xəbər verir ki, bu barədə ABŞ Silahlı Qüvvələrinin Mərkəzi Komandanlığı (CENTCOM) X sosial şəbəkəsindəki səhifəsində məlumat yayıb.

“İraqdakı Əl-Əsəd aviabazasına 122 mm-lik raket atılıb, tələfat və dağıntı yoxdur”, - CENTCOM bildirib.

O, həmçinin bildirib ki, birləşmiş birgə işçi qüvvəsi (Operation Inherent Resolve) raket buraxılış sahəsinin yerini müəyyənləşdirib və araşdırma aparmaq üçün hadisə yerinə İraq Təhlükəsizlik Qüvvələri (ISF) göndərilib. Nəticədə, İraq təhlükəsizlik qüvvələri hadisə yerində olan 5 ədəd 122 mm-lik raket atmaq üçün modifikasiya edilmiş yük maşını ələ keçirib.