İranın addımı Hindistanı hərəkətə gətirdi – Dərhal hazırlığa başladılar

Hindistan ticarət gəmisinə PUA hücumundan sonra Ərəbistan dənizində üç döyüş gəmisi yerləşdirəcək.

Teleqraf.com xəbər verir ki, bu barədə Hindistan Hərbi Donanması məlumat yayıb.

“Ərəbistan dənizində son zamanlar baş verən hücumları nəzərə alaraq, Hindistan Hərbi Dəniz Qüvvələri çəkindirməni qorumaq üçün müxtəlif ərazilərdə “Mormuqao”, “Koçi” və “Kolkata” idarəolunan raket esmineslərini yerləşdirib”, - məlumatda deyilir.

Donanmadan bildirilib ki, mühafizəyə P8I uzaqmənzilli dəniz kəşfiyyatı təyyarələri də cəlb olunacaq.

Böyük Britaniyanın Dəniz Ticarət Xidmətinin məlumatına görə, PUA zərbəsi Hindistan sahillərində ticarət gəmisinə ziyan vurub və insident nəticəsində ölən olmayıb. ABŞ Müdafiə Nazirliyi (Pentaqon) isə bəyan edib ki, gəmiyə hücum edən PUA İrandan buraxılıb.