Daha üç ölkə Qırmızı dənizə hərbi missiya göndərəcək

İtaliya, Almaniya və Fransa Avropa İttifaqının (Aİ) digər ölkələrinə Qırmızı dənizdə naviqasiya təhlükəsizliyini təmin etmək üçün hərbi missiya yaratmağı təklif etmək niyyətindədir.

Teleqraf.com xəbər verir ki, bu barədə İtaliyanın xarici işlər naziri Antonio Tayani bildirib.

Diplomat vurğulayıb ki, İtaliya, Fransa və Almaniyanın təşəbbüsü Qırmızı dənizdə ticarət gəmiçiliyini qorumaq üçün Hörmüz bağazında həyata keçirilən “Agenor” hərbi əməliyyatın genişləndirilməsini nəzərdə tutur.

Tayaninin sözlərinə görə, üç ölkənin təklifi yanvarın 22-də Aİ-nin xarici işlər nazirlərinin görüşündə müzakirə olunacaq və bu təşəbbüsə Aİ-yə üzv olmayan dövlətlər də qoşula bilər.

İtaliya XİN başçısı missiyanın ən qısa zamanda işə başlaya bilməsi üçün dərhal siyasi qərarın veriləcəyinə ümid etdiyini bildirib. Tayani həmçinin tezliklə Livan, İsrail və Fələstinə səfər edəcəyini də söyləyib.

Xatırladaq ki, Qəzza zolağında Fələstin-İsrail münaqişəsinin şiddətlənməsindən sonra Yəməndəki husi üsyançıları İsrail ərazisinə hücumlar həyata keçirəcəyini və Fələstində əməliyyatlar dayandırılana qədər gəmilərin Qırmızı dəniz və Bab əl-Məndəb boğazı sularından keçməsinə icazə verməyəcəklərini bildiriblər. ABŞ Silahlı Qüvvələrinin Mərkəzi Komandanlığının hesablamalarına görə, husilər keçən ilin noyabrın ayının ortalarından bəri Qırmızı dənizdə 20-dən çox mülki gəmiyə hücum edib.