Moskvada həyəcanlı anlar: Putinin iqamətgahına “silahlı basqın”

Moskvada yaşlı bir kişi oyuncaq silahla Rusiya Prezidenti Vladimir Putinin iqamətgahına girməyə cəhd edib.

Teleqraf.com xəbər verir ki, bu barədə Rusiya Teleqram kanalları məlumat yayıb.

Aprelin 3-də səhər saatlarında Rusiya Federal Təhlükəsizlik Xidmətinin (FSB) əməkdaşları bina yaxınlığında əlində avtomata bənzər əşya olan şübhəli şəxsi görüblər. O, saxlanılıb. Məlum olub ki, həmin şəxs Ukraynada anadan olan 69 yaşlı Viktor Krasivskidir.

Yaşlı adamın üzərində qara rəngli “Kalaşnikov” avtomatına bənzər uşaq oyuncağı olub.

Krasivski polisə bildirib ki, 15 ildir prezidentlə görüşməyə çalışsa da, ona həmişə rədd cavabı verilib. Bu dəfə də “təcili məsələlərin müzakirəsi” üçün şəxsi qəbulda iştirak etmək qərarına gəlib.

Krasivski polis bölməsindən psixiatriya xəstəxanasına köçürülüb.