Fidan və Blinken bölgədə artan gərginliyi müzakirə etdi

Türkiyənin xarici işlər naziri Hakan Fidan bu gün ABŞ Dövlət katibi Entoni Blinkenlə telefon danışığı aparıb.

Teleqraf.com xəbər verir ki, bu barədə Türkiyə Xarici İşlər Nazirliyinin rəsmi nümayəndəsi Öncü Keçeli “X” sosial şəbəkəsində məlumat verib.

“Qarşı tərəfin təşəbbüsü ilə keçirilən telefon görüşməsində İsrail ilə HƏMAS arasındakı danışıqlar prosesi, eləcə də regionda artan gərginlik müzakirə edilib. Nazir qeyd edib ki, HƏMAS Siyasi Bürosunun rəhbəri Həniyənin qətlə yetirilməsi və fələstinlilərin öldürülməyə davam edilməsi İsrailin sülhün bərqərar olmasına səy göstərmədiyini bir daha nümayiş etdirir”, - paylaşımda deyilir.

Keçelinin sözlərinə görə, Fidan Blinkenlə söhbətində HƏMAS-ın bu məsələdə konstruktiv mövqe tutduğunu və tam atəşkəsə nail olmaq üçün İsrailə təzyiq etmək lazım olduğunu bildirib.

Türkiyə XİN başçısı onu da qeyd edib ki, regionda artan gərginlik narahatlıq doğurur və İsrail münaqişənin daha da genişlənməsinə səbəb olacaq təxribat xarakterli addımlardan çəkinməlidir.