Moskvanın növbəti hədəfi: “Rus tankları Ukraynada dayanmayacaq”

Rusiya Qərbə qarşı müharibə aparır, ona görə də çətin ki, Ukraynanı ələ keçirməklə məhdudlaşsın.

Teleqraf.com xəbər verir ki, bunu Çexiya xarici işlər naziri Yan Lipavski deyib.

“Rusiya Ukraynada qalib gəlsə, tanklarının qərb sərhədində dayanacağına inanmaq sadəlövhlükdür. Onların baxışlarına görə qonşularının suverenliyi və ərazi bütövlüyü, eləcə də vətəndaşlarının azadlığı Rusiyanın baxışına uyğun olmalıdır”, - nazir bildirib.

Lipavskinin fikrincə, Rusiya qətiyyət və güc dilini başa düşür, ona qarşı məhz bu vasitələrdən istifadə edilməlidir.

“Əgər onları biz özümüz yaratmasaq, Rusiya təcavüzünün sərhədləri olmayacaq”, - Çexiyanın baş diplomatı vurğulayıb.

Lipavski Ukraynanın maraqları hesabına Rusiyaya güzəştə getməyi məqbul sayan avropalı siyasətçiləri danlayıb.

“Dəyərlərimizi qətiyyətlə qorumaq istəyiriksə, hərəkət etmək üçün cəsarətə ehtiyacımız var”, – xarici işlər naziri əlavə edib.