Ukrayna ağır itkinin bir addımlığında: Bu şəhəri də ələ keçsə...

Rusiya Ukrayna ordusunun Kursk vilayətinə hücumunun onun yeni ərazilər ələ keçirmək planlarını pozmasını istəmir. Buna görə də Ukrayna qoşunları Donetsk vilayətinin şərqində mövqelərini itirməkdə davam edirlər.

Teleqraf.com xəbər verir ki, bu barədə “Financial Times” yazır.

Britaniya nəşri hesab edir ki, Pokrovsk şəhərinin (Donetsk) tutulması Ukrayna Silahlı Qüvvələrinin bölgənin qalan hissəsində müdafiəsini sarsıda bilər. Çünki şəhər Kramatorsk və Kostiantinivkaya nəqliyyat qovşağı kimi xidmət edir, həmçinin mərkəzi Ukrayna ilə yol əlaqəsini təmin edir.

Britaniya Müdafiə Nazirliyinin məlumatına görə, Rusiya ordusu şəhərin 10 kilometrliyindədir, amma yaşayış ərazilərinə yaxınlaşdıqdan sonra irəliləyişi ləngiyə bilər. Həmçinin Selidovoda Rusiya hərbçiləri göründükdən sonra minlərlə insan Pokrovsku tərk edib.

ABŞ-ın Müharibə Araşdırmaları İnstitutunun fikrincə, Rusiya komandanlığı Pokrovsk və Toretsk ətrafındakı cəbhə bölgələrindən döyüşə hazır birləşmələri geri çəkməyə son dərəcə istəksizdir.