Tbilisinin mərkəzi etirazçılardan təmizlənir - Yeniləndi

Tbilisinin Rustaveli prospektinin etirazçılardan təmizlənməsi davam edir.

Teleqraf.com xəbər verir ki, aksiya iştirakçıları oturacaqlar və zibil qutularından barrikadalar düzəldiblər.

Etirazçılar zibil qutularını yandırıblar, xüsusi təyinatlılara tərəf pirotexniki vasitələr atırlar.

Xüsusi texnika prospekt boyu hərəkət etməkdə davam edir. Parlament binasının qarşısı və ətrafı etirazçılardan tam təmizlənib.

***

00:51

Tbilisidə keçirilən kütləvi aksiya dağıdılır.

Teleqraf.com xəbər verir ki, polis qüvvələri etirazçıları davamlı olaraq dağılışmağa çağırır.

Hazırda xüsusi texnikalar vasitəsilə Rustaveli prospekti etirazçılardan təmizlənir.

Gürcüstanın Daxili İşlər Nazirliyindən bildirilib ki, aksiya qanunla müəyyən edilmiş çərçivələrdən kənara çıxıb, mitinq iştirakçıları polis əməkdaşlarını şifahi və fiziki təhqir ediblər, onların tərəfinə müxtəlif əşyalar və pirotexniki vasitələr atıblar. Qeyd olunub ki, nəticədə iki polis nəfəri xəsarət alıb.

Aksiya zamanı xəsarət alan və saxlanılan etirazçıların dəqiq sayı hələ məlum deyil.