Merkelin namizədi: Şoltsu o əvəzləyə bilər

Xristian Demokrat İttifaqının lideri Fridrix Merz Almaniya kansleri vəzifəsinə uyğun namizəddir.

Teleqraf.com xəbər verir ki, bunu ölkənin keçmiş kansleri Angela Merkel deyib.

Onun sözlərinə görə, Merz bu məqsədə çatmaq üçün uzun müddətdir çalışır.

“Ümid edirəm ki, onun uğurlu seçki kampaniyası aparmaq üçün kifayət qədər gücü olacaq”, - Merkel vurğulayıb.

Seçkilərdən əvvəl Almaniyanın növbəti kansleri kimi Merzin şansları yüksək qiymətləndirilir. Hazırkı Kansler Olaf Şolts rəqiblərindən ən aşağı pillələrdədir.

Xatırladaq ki, dekabrın 16-da Almaniya parlamenti Olaf Şolts hökumətinə etimadsızlıq göstərib. Bundan sonra növbədənkənar seçkilər təyin edilib. Seçkilər 2025-ci il fevralın 23-də keçiriləcək.