Los-Anceles külə döndü – Yalnız o villa salamat qaldı

ABŞ-nin Kaliforniya ştatının Los-Anceles şəhərində baş verən yanğın fırtınanın təsiri ilə yenidən böyük ölçülərə çatıb.

Teleqraf.com xəbər verir ki, indiyədək 12 min ev və avtomobilin külə çevrildiyi bildirilərkən, 150 minə yaxın insanın hələ də evlərinə qayıtmasına icazə verilməyib.

Yanğının vurduğu zərərin 60 milyard dollar olduğu ehtimal edilir.

Yanğınlarda azı 11 nəfərin öldüyü bildirilir. Yanğınsöndürmə qurumlarından verilən yeni məlumata görə, Palisades bölgəsində baş verən yanğınlarda 5, Altadenada isə 6 nəfər həyatını itirib.

Fəlakət bölgəsində möcüzələr də baş verir. Malibu sahili külə dönərkən, 2000-ci ildə tikilmiş villa heç bir zərər görmədən yanğından salamat çıxması ilə diqqət çəkib. Məşhur amerikalı professor və iş adamı Devid Ştaynerə məxsus olduğu güman edilən villanın dəyərinin 8 milyon dollar olduğu deyilir. Ətrafı külə dönmüş villanın necə toxunulmaz qalması maraq doğurur.

Yanğınsöndürənlərin müdaxiləsi nəticəsində demək olar ki, zərər görmədən xilas edilən villanın yaşayış sahəsi 390 kvadratmetrdir.

Los-Ancelesdə günlərdir davam edən yanğından sonra Nyu-Yorkdan da bəd xəbər gəlib. Nyu-York Yanğından Mühafizə İdarəsi yanğında 7 nəfərin yaralandığını və yanğını nəzarət altına almaq üçün əraziyə ekipajların göndərildiyini açıqlayıb.