Tbilisidə bazarda yanğın lokallaşdırıldı - YENİLƏNDİ

Tbilisinin “Lilo” bazarı ərazisində baş vermiş yanğın lokallaşdırılıb.

Teleqraf.com-un yerli bürosu xəbər verir ki, bu barədə Gürcüstanın Fövqəladə Halların İdarə Olunması Xidmətinin rəisi Temur Mqebrişvili jurnalistlərə bildirib.

Onun sözlərinə görə, yanğının ətrafa yayılması təhlükəsi aradan qaldırılıb.

T.Mqebrişvili yanğın zamanı xəsarət alanların olmadığını qeyd edib.

Bazar ərazisində yanğın təxminən 5 000 kvadrat metr ərazini əhatə edib. Yanğının söndürülməsinə 120-dən çox yanğınsöndürən və 22 avtosistern cəlb olunub.

***

16:07

Tbilisinin “Lilo” bazarı ərazisində yanğının söndürülməsi işləri davam etdirilir.

Teleqraf.com-un Gürcüstan bürosu xəbər verir ki, hadisə yerinə səkkiz yanğın-xilasetmə briqadası cəlb olunub.

Xəsarət alanlar barədə məlumat yoxdur. Yanğının səbəbi hələ bilinmir.

***

15:30

Tbilisi yaxınlığında yerləşən “Lilo” bazarının ərazisində güclü yanğın başlayıb.

Teleqraf.com-un Gürcüstan bürosu xəbər verir ki, yanğının anbarda baş verdiyi bildirilir.

Əraziyə yanğınsöndürmə maşınları cəlb olunub.