Ağ Evin rəsmi saytında Rusiyanın “Terrorçu ölkələr” siyahısına salınması barədə petisiya yerləşdirilib.
Qısa müddət ərzində petisiya 100 min nəfərdən çox insan tərəfindən imzalanıb. Maraqlı fakt ondadır ki, imza atanların əksəriyyəti ABŞ-dan kənarda yaşayan və Rusiyanı məhz terrorçu ölkə kimi tanıyan insanlar tərəfindən imzalanıb.
Teleqraf.com-un yaydığı məlumata görə, ABŞ hökumətinin petisiyaya rəsmən cavab verməsi üçün, yerləşdirilən gündən 30 gün ərzində ən azı 100 min insan tərəfindən imzalanmalıdır. Petisiya sayta cari ilin aprel ayının 23-də yerləşdirilib.
Bu arada, Rusiya mətbuatı yazır ki, ABŞ hökuməti heç də hər petisiyaya reaksiya vermir.
Petisiyada deyilir: “Rusiya Ukraynaya qoşun yeridərək, orada gizli terror əməliyyatları həyata keçirir. Bu da beynəlxalq terrorizm anlayışına uyğun addımdır”.
Hər hansı ölkənin “Terrorçu-ölkə” siyahısına daxil olunması o deməkdir ki, həmin ölkəyə qarşı ciddi iqtisadi və siyasi sanksiyalar tətbiq olunur.
Hazırda ABŞ administrasiyası İran, Suriya, Kuba və Sudanı terrorizmi maliyyələşdirən ölkələr siyahısına salınması barədə müzakirələr aparır.
Ülviyyə