Türkiyədə terror: ölən və yaralananlar var

Türkiyənin Şırnak vilayətinin Cizrə rayonunun Nur məhəlləsindəki Cizrə qarnizonuna PKK terrorçularının hücum etməsi nəticəsində ölən və yaralananlar var. Bu barədə Trend Anadolu agentliyinə istinadən məlumat verir.

Hadisə yerinə təhlükəsizlik qüvvələrinin gəlməsindən sonra qarşıdurma baş verib.

Qarşıdurmada "Dəclə Elektrik Dağıtım AŞ"nin (DEDAŞ) əməkdaşı 39 yaşlı Məsud Sanrı həlak olub, 3 əsgər və 4 sakin yaralanıb.

Yaralıların Cizrə Dövlət Xəstəxanasına çatdırıldığı bildirilir.

Məlumatda qeyd olunur ki, hadisə yerinə gəlmiş polis avtomobilinə terrorçular minaatanlardan atəş açıblar.

Bildirilir ki, hazırda terrorçuların zərərsizləşdirilməsi üçün genişmiqyaslı əməliyyat həyata keçirilir.